20210505領域會議

翠 盧 莉 嘛 有 春 天

阮社區溝仔邊的翠盧莉，最近毋知致著啥物病？焦薦了了，我想欲去共整理一下。

阿公聽著就講：「翠盧莉袂輸草霸王咧，臭賤閣𠢕生湠，插枝就會活矣。」

阿菊姨𪜶兜有種，我就走去問伊：「我敢會使去恁兜鉸寡來種？」阿菊姨講

：「無問題！欲偌濟據在你鉸啦！」

隔壁的阿源伯行倚來講：「鉸平平種袂活，四十五度趨趨共鉸落較好種。」

「免傷長，大約十五公分就會當，閣愛鉸著有節的所在喔！」阿順叔共阮提醒。

「鉸好愛共花佮葉仔挽掉，營養才袂予𪜶食食去。」阿慧嬸綴咧講。

「猶閣有，免插傷深，量其約掠一下，三肢指頭仔闊就有夠矣。」阿蘭姆嘛紲咧講。

逐家你一句，我一句，講甲熱怫怫！

我歡頭喜面共厝邊頭尾說多謝：「多謝逐家共我牽教，予我學著遮濟撇步佮鋩角。」

「社區是咱逐家的，阿華閣遮爾有心，咱當然嘛愛共鬥跤手。而且『一人智，毋值眾人議』咱人濟好辦事，一睏仔就解決矣。」阿順叔大聲講。

阿慧嬸喙笑目笑講：「是啊！咱來遮運動，閣順紲種花。一兼二顧，偌好咧！」

有逐家來鬥相共，一觸久仔規排的花就種好矣。

這時，拄好里長伯仔行過來講：「逐家勞力！辛苦囉！最近咱社區加真清氣，逐家攏會共糞埽提轉去，連狗屎嘛攏無看著矣。有遮爾清幽的環境，攏是咱遮的好厝邊的功勞喔！」

溝仔邊是阮厝邊頭尾散步、運動的所在，嘛是逐家開講、聯絡感情的好所在。

無偌久阮種的翠盧莉就發穎矣。隔轉年，嘛開花矣。茄仔色的花蕊，就親像一支一支的鼓吹，歕出充滿幸福的音樂。

喔！原來只要有心，翠盧莉嘛有迷人的春天！

語詞練習：

薦：枯萎、乾枯。例：花薦去矣！(花枯了)

生湠：生育、繁殖。例：鳥鼠真𠢕生湠。(老鼠很會繁殖)

臭賤：形容花草植物因滋衍繁多而失去珍貴的價值。鳳尾草雖然臭賤，毋過若是熱著的時，共伊煎來做茶啉嘛誠有效。