20201021領域會議
做伙來去看貓仔 一、 繪本內容 阿母 ! 後禮拜一，老師欲 𤆬 我去看貓仔呢！阿涵仔！貓仔有啥物通看的 ? 咱兜都有矣！而且閣是『波斯貓』呢！ 彼無仝！老師講遐有足濟貓仔的。阿母，阮規班攏欲去呢！ 出發囉 ! 火車真緊就載阮這陣臺北倯，來到猴硐仔。 老師！遮叫做猴硐，是毋是有真濟猴山仔？ 老師笑笑講：「等咧恁就知矣！」 一下落車，過天橋，看著真濟貓咪的相片，有夠古錐的！ 哇！遐有一隻黑貓，這隻是白的，哇！足濟貓咪呢！ 真濟人提手機仔一直翕！一直翕！ 阿明！你緊來翕這隻！伊欲走去矣！ 老師趕快講：：「逐家毋通逐貓仔，會共嚇驚著！ 雄雄看著有一个人，攑一枝棍仔咧弄貓咪，邊仔的人攏笑甲反過。 老師共逐家叫倚來講：「貓咪是欲予人看的，毋是來創治的！按呢！誠無公德心！」 老師！彼爿有人提魚脯仔咧飼貓咪呢！咱嘛提一寡物件來去予貓咪食。 千萬毋通！咱是來參觀毋是來破壞環境的！ 老師！為啥物按呢是咧破壞環境咧？ 老師講：「貓咪有家己佮意的環境，咱若烏白舞，顛倒會攪吵 𪜶 、影響著 𪜶 的生活」 老師，阮知影矣！去到生份的所在，除了欣賞，嘛愛尊重 𪜶 的環境，絶對袂使破壞當地的生態。 今仔日有夠歡喜！阮毋但學著愛護動物，閣知影生態的重要，多謝老師！ 欲來轉矣！黃昏的日頭陪伴阮輕鬆的跤步，貓咪再會！愛乖乖喔！ 有閒阮會閣來看恁！ 造詞練習 1. 翕： 翕相／翕死／翕熱 2. 仝： 仝款／無仝／ 兄弟若仝心，烏塗變成金 造句練習 1. 足濟： 伊的齣頭 足 濟 ( 真多 ) 。 2. 雄雄： 你叫做啥物名，我雄雄 ( 突然、猛然、一時間 ) 煞袂記得。 3. 顛倒：① 你物件囥顛倒 ( 次序倒置 ) 矣。 ② 伊無欲來，阮顛倒（反而）較歡喜。 ③ 你話毋通顛倒 ( 與事實相反 ) 講。