20200415鄉土領域會議
佇金色的海邊仔 阿財 拳頭拇捏絚絚，衝去拍 阿明 ，老師看著，就趕緊共 亻因 二人搝開。毋過，已經傷慢矣 ! 阿明 予 阿財 拍甲頭殼流血，過無偌久， 阿明 的阿爸氣怫怫來到學校，愛校長共 阿財 退學，若無就愛換班。 阿財 的阿媽三步當做兩步走，趕去學校了後，一直共 阿明 的老爸佮老師會失禮。阿媽講這个囡仔，從細漢就無老爸，老母閣嫁人，伊逐工愛無閒照顧中風的老的， 阿財 才無人管教，是一个可憐的囡仔，拜託逐家予伊一擺改過自新的機會，伊是有喙講甲無瀾， 阿明 的老爸才無閣受氣。 陳 老師拄教這班，對 阿財 無蓋了解，經過這站仔的觀察，才發現 阿財 個性衝碰 𠢕 受氣，定定為著小可仔代誌就起跤動手，學校共 阿財 安排檢測，發現伊敢若有坐袂牢的傾向，所以人緣真 䆀 。 陳 老師真認真，除了利用下課的時間教伊功課，嘛會主動揣 阿財 開講，共伊當做是朋友，希望 阿財 會當共心內話加減仔講出來。因為有 陳 老師的牽教， 阿財 愈來愈有笑容，嘛愈來愈快樂。 阿財 是足巧的囡仔，嘛足認真學，才個外月伊的功課就進步甲有 khuainn 。嘛袂閣參同學冤家，伊的笑容愈來愈濟。 這工，日頭已經落山， 阿財 閣無轉來，阿媽佮老師做陣去揣伊，揣到海邊仔，看著 阿財 一个人佇咧抾螺殼佮樹枝，專工排一个媠媠的圖，欲送予 陳 老師， 陳 老師感動甲目箍紅紅，就摸 阿財 的頭殼，這時陣， 阿財 感覺伊的人生就親像海邊仔的夕陽遐爾仔媠。