20190424鄉土領域會議
過年 欲過年矣，規條迪化街人 實捅捅 ，五花十色的年貨滿滿是，遮喝 : 「來買甜粿、發粿，予恁趁錢趁 家伙 ! 」遐喝 : 「糖仔、餅仔、魷魚絲，試吃攏免錢 ! 」逐家一塊吞落喉、一塊提佇手裡，食甲真歡喜。我佮阿母款一大堆，欲來高雄阿公遐過年。 轉到厝，逐家無閒咧摒掃，阿公講 : 「大摒厝才會富」。阿叔咧貼春聯，我緊共佇學校寫的「新年快樂、恭喜發財」提出來展寶。 阿叔講 : 「哇 ! 有夠媠 ! 若咧畫土符仔咧 ! 」伊看著我一个仔面膨獅獅，才緊講 : 「佮你 滾笑 的啦 ! 」 阿媽佮阿母佇灶跤別攢好料的，我去鬥相仝，小妹一直佮我相爭做，無細膩煞俥倒水，顛倒纏跤跘手予人趕出來，阮規氣佇門口袁走相逐，覕相揣，連阿叔飼的彼隻狗，嘛綴阮傱來傱去，耍甲真歡喜。 廿九暝，阮一家伙仔做伙食 腥臊 講好話，阿媽說 : 「圍爐坐予圓圓圓，平安幸福好過年 ! 」我嘛講 : 「食柑桔大吉大利 ! 」 紲落去，阿公阿媽提紅包共阮硩年，講 : 「予恁平安敖大漢，考試考第一。」我佮小妹嘛祝阿公阿媽身體勇健食百二，話一下講煞，阮隨就走去邊仔偷偷仔算看紅包有幾包？一包、兩包、三包，哇 ! 攏總有六包呢 ! 真正 卯死 矣 ! ◎實捅捅 : 塞得很滿 ◎家伙 : 財產 ◎滾笑 : 開玩笑 ◎腥臊 : 菜色豐盛 ◎卯死 : 賺到 聽講二九暝愈晏睏，爸母愈長壽，所以食飯飽阮就陪阿公阿媽奕牌仔，我佮阿爸一組，小妹佮阿母一組，往年阮這組攏是「美國西裝」 － 大輸，這擺總算贏矣，予我暢幾若工。 初一阮去廟裡拜拜，祈求菩薩保庇阿公阿媽食百二，阿爸阿母趁大錢。彼工廟埕鬧猜猜，有歌仔戲咧搬八仙過海，也有弄龍佮弄獅，李仔攕、牽糖絲排規排，大人囝仔笑咍咍，猶有煙腸擔咧拚生理。 「來喔」十八骰仔擲落去，添財添福氣，十八骰仔若轉完囝孫仔中狀元。人客圍甲密喌喌，贏的笑微微，輸的吐大氣。 阿爸閣 𤆬 阮去頂港有名聲，下港上出名的「義大遊樂世界」 𨑨 迌。遐的遊樂設施攏足好耍的，尤其是彼个踅三百六十度，連鞭正、連鞭倒，轉的『天旋地轉』閣較刺激，逐家攏耍甲吱吱叫 ! 我上佮意過年，毋但會當穿新衫、食好料的，閣有紅包通領，真正足快樂的 ! ◎李仔攕 : 糖葫蘆。 ◎牽糖絲 : 棉花糖。 ◎連鞭 : 馬上、隨即。